《超人回來了》換新血 蘇怡賢 吳智昊 加盟

韓國KBS人氣親子綜藝節目《超人回來了》之前捧紅過唔少家庭，好似宋一國同三胞胎、秋小愛父女咁，不過近期《超人回來了》成日換血，今日更先後爆出有三個家庭先後加盟節目，當中包括韓劇《茶煲阿四》男星吳智昊、韓劇《3days》女星蘇怡賢同印喬鎮夫婦、以及歌手梁東根，以上三個家庭都將出演《超人回來了》。

唔少粉絲得知消息後，都估計《超人回來了》又有成員將會退出，不過節目組就暫時未有公佈。現時《超人回來了》出演包括李輝才同雙胞胎兒子、國腳李同國及仔女、奇太映和愛女、李凡秀同仔女。

韓國方面就指吳智昊同去年12月30號出世嘅B女今日已投入拍攝，吳智昊將獨自湊B 48小時。而蘇怡賢前年下嫁男星男星印喬鎮，去年二人仲升呢做爸媽，順利誕下B女，一家三口生活得好幸福。蘇怡賢同印喬鎮夫婦將攜B女出演KBS人氣親子綜藝節目《超人回來了》，並將於今日進行首次錄影。

根據蘇怡賢所屬嘅Keyeast事務所就話：「蘇怡賢同印喬鎮一家將作為固定成員出演《超人回來了》，與其他成員家庭一齊展現各自嘅魅力。」

另外，亦都有消息話歌手梁東根都會同仔女一起出演《超人回來了》。